அனய்

அனய் (ராதையின் கணவன்)

கவிஞர்: அருணா டேரே
மொழிபெயர்ப்பு: ஆர். தீபா

நீ நட்சத்திரங்களின் ஒளி ஊரிலிருந்து,
இறங்கி அவனது
இருப்பிடத்திற்கு வந்திருந்தாய்!
வானக் கருமேகத்தின் மீதான ஈர்ப்பு உன் ரத்தத்திலேயே இருந்தது.
இதை அவன் முற்றிலுமாக முன்னமே உணர்ந்திருந்தான். 
 
மின்னல் ஒளி உன் பெண்மை.
அவ்வொளியை வாங்கியவர் மீண்டும் திரும்பவே முடியாது என்பதை
மனதின் ஆழத்தில்
நன்கு அறிந்து வைத்திருந்தான்.  

உன் மின்னும் கனவிலாடும் மயில் தோகைகளை,
அவன் எப்போதும் தன் கண்களால் காண முயற்சிக்கவே இல்லை

உன் உடலில் பாய்ந்தோடும் மது மயக்கமூட்டும்,
நீலக் குளத்தை அவன் ஒருபோதும் சேறாக்கியதில்லை.

அவனது நிலத்து வாழ்க்கையில்,
உன் தேவலோக சிவப்புச் சாயம் பூசப்பட்ட பாதங்கள்,
தடங்களாய்ப் பதிந்திருந்தன. 

வீட்டில் உன் இருப்பின் வாசம் அழிவற்று நிலைபெற்றிருந்தது.
நீ அவனைச் சுற்றி  வந்து போய்க் கொண்டிருக்கும் போதெல்லாம்,
அவன் நிறைவின் விளிம்பை  உணர்ந்தான்.
உன்னிடம் மிகுந்த நன்றியோடிருந்தான். 
உன் சுய நினைவற்ற உணர்ச்சித் ததும்பலை,
அவன் கண்டிருந்தான்.

இரவின் பேரழகில், 
இருளின் கருப்பில்,
நீ கலப்பதை,
இனிப்பு நஞ்சு உன் பித்துக்கொள்ள வைக்கும் உதடுகளின் வழியாக,
மிடறு இறங்குவதை , பரவசத்தின் போதும்,
உணர்ச்சித் திளைப்பிலும்,
ஒவ்வொரு கணமும் உன் இருப்பைக், காதலின் முகத்தில் மிகத் தீவிரமாக நீ வாரிச்சொரியும் போதும்,
அவனுக்குத் தெரிந்திருந்தது.

நிறைவுக்கு பின்னும் ,   
இன்னுமின்னும் எழும்  நிறைவேறாத
உன் ஆசைத் தாகம், துக்கத்தின் நகங்கள் ரணமாக்கிய உன் இதயத்தின் உச்சகட்ட தவிப்பை அவன் உணர்ந்தான்.

காதலில்,
ஒரு பெண்,
முழுமையில் பொங்கியவளாகவும், வெறுமையில் நகர்பவளாகவும்,
எப்படி ஆகிறாள்?
எனப் புரிந்து கொண்டான்.

நீ அர்த்தமற்ற பாதையில் தோற்றுவிட்டாய்!
என அவனுக்குத் தெரியும்.
ஆனால், நீ தோற்கவில்லை ,
உன் சுயமரியாதையைக் காப்பாற்றிக் கொண்டு உன்னில் நிலைத்திருந்தாய் என்பதும் அவனுக்குப் புரிந்தது.

அவனாகவே முன்வந்து உனது இமைகளில் வழிந்த சோகத்தைத் துடைத்தான்.

அந்த நொடி,
ராதே!
நீ உன்னுடைய ஆண்மகனைச் சந்தித்தாய்!
ஆண் என்பவன்,  ஒருவரை மன்னிப்பதனால் அவரைத் தனக்குக் கடன் பட்டவராக்குவதில்லை!
முதுகுக்குப் பின்னால் குறைத்து மதிப்பிடுவதில்லை!

உன்னைப் புரிந்து கொண்டு அன்பால் முழுமையாக்கி மார்போடு அணைத்துக் கொள்பவன்! 
தான் காணாத கனவுக்கும்,
தன் இதயத்தில் மாளிகை அமைப்பவன். 

ராதே!
ஆண் என்பவன் இப்படியும் கூட இருக்க முடியும்!